أزمة أخلاق

كلكم عارفين ان انا نزلت اجازة الى ارض الوطن ... طبعا كان الوطن واحشنى جدا ..

اول ما نزلت من الطيارة حضنت الوطن وبوسته من هنا ومن هنا...بس لقيت شكله كده مش عاجبنى المهم سلمت عليه وعلى الاهل و....................................

طبعا دى مقدمة ادبية جدا وعايزكم تصقفولى على التشبيهات والحاجات دى .... بس انا هنا عايز انكلم بجد شوية

انا فعلا فوجئت بازمة اخلاق طاحنة فى وسط الناس لما نزلت الاجازة دى بالذات... اختفت كثير جدا من القيم والمثل والمبادئ اللى اتربينا عليها زى ..التسامح ..الكرم ..النخوة..الشهامة..الحب الصادق..التكافل..

واحد صاحبى حكالى قصة هاتلخص لكم كل الكلام اللى عايز اقوله

صاحبى دا ابن ناس كويسين زينا كلنا متربى زى ما اهلينا ربونا... نزل اجازة وهو ماشى بالعربية غصب عنه طرطش ميه من الارض على واحد ماشى بيقولى انه كان راجل كبير فى السن على عكاز... طبعا الراجل قعد يشتم ويشاور على العربية بالعكاز ..صاحبى طبعا كان مش سامع حاجة ومش فاهم هو بيقول ايه ... المهم هو ركن على جنب ونزل علشان يعتذر لان هى دى تربيته.... بيقولى اول لما قربت على الراجل رفع العصايا وهو خايف كان فاكر انى جاى اتخانق معاه علشان شتمنى ..لكن انا قلت له انا اسف انى طرطشت عليك الميه والله ما خدتش بالى من الميه اللى فى الارض تحب حضرتك اوصلك لمكان ؟... قالى صاحبى الراجل وقف مذهول فاتح بقه ومش عارف يتكلم وبعدين اتكلم وقال لى انت بجد نازل مخصوص علشان تعتذر؟ صاحبى قاله ايوه ... وفجأة الراجل قعد يدعى لى انا واهلى ان ربنا يخلينى ليهم وحاجات كتير كده... وقال لى يابنى مافيش حد بيعتذر فى الزمان ده.... وبدأ يتكلم عن نفسه فقال: انا سقف بيتى بينقط ميه ولما قلت لجارى اللى فوق غير بلاط الشقة وادفع لك نص التكلفة رد وقال لى يا تدفع التكلفة كلها يا بلاش... وهنا انتهت القصة

طبعا لا تعليق واظن الفكرة وصلت

علشان كدة فكرت فى فكرة المدونة دى ...طيب هايكون فيها ايه وهانمشى ازاى ؟ بسيطة جدا

1. هانقول الصفة او الخلق واصلها اللغوى

2. ادلة من القران والسنة

3. مواقف من حياة الصحابة والتابعين على نفس الصفة

4. تطبيق للصفة دى فى حياتنا اليومية

خلاص يا شعب انا بس بجد عايز رايكم فى الفكرة ولو حد عنده اقتراحات لتطويرها..... ويشرفنى تفاعلكم معايا